Արցախի նախկին պետնախարար Ռուբեն Վարդանյանը ստիպված է եղել դիմել Ադրբեջանի մարդու իրավունքների պաշտպան Սաբինա Ալիևային հրապարակային կոչով՝ իր և մյուս հայ գերիների կացության և դատական գործընթացի մասին տեղեկություն ստանալու համար։ Այս մասին հայտնում է նրա ընտանիքը։
Ըստ ընտանիքի՝ Ռուբեն Վարդանյանը այս քայլին դիմել է այն բանից հետո, երբ նախորդ տասը օրերին փաստաբանի միջոցով, գրավոր դիմումներով և հեռախոսազանգերով կապ հաստատելու բոլոր ջանքերը հաջողություն չեն գտել։
Հայտարարության մեջ նշվում է, որ դատավարությունների ավարտից մեկ ամիս անց հայ բանտարկյալները դեռևս չեն ստացել իրենց դատավճիռների տեքստերը ոչ մի լեզվով՝ ռուսերեն, հայերեն կամ ադրբեջաներեն։ Նրանք անհայտ են մնում, թե ինչ հոդվածներով են դատապարտվել, ինչպես և իրենց տեղափոխման վայրը։
Ընտանիքը խորը մտահոգված է ստեղծված իրավիճակով՝ նշելով, որ իրենց և մյուս հայ գերիների կացության մասին արժանահավատ տեղեկությունների բացակայությունը, ինչպես նաև Ադրբեջանում մարդու իրավունքների անկախ մեխանիզմների, այդ թվում՝ Կարմիր Խաչի միջազգային կոմիտեի հեռացման հետևանքով, բոլոր գերիներին զրկում է ցանկացած ինստիտուցիոնալ պաշտպանությունից։
Ռուբեն Վարդանյանը հրապարակել է Սաբինա Ալիևային ուղղված իր դիմումի աուդիոձայնագրությունը։ Ձայնագրության մեջ նա նշում է, որ չնայած 2023 թվականի հոկտեմբերին տեսախցիկների առաջ Ալիևան իր հեռախոսահամարը հանրությանը տրամադրել էր, վերջին տասը օրերի ընթացքում նրան հաջողված չէ կապ հաստատել։
«Տիկին Ալիևա, ես ստիպված եմ Ձեզ դիմել հրապարակավ, քանի որ այլ հնարավորություն չունեմ Ձեզ հասցնելու այն, ինչ տեղի է ունենում թե՛ ինձ հետ, թե՛ իմ գործընկերների ու համախոհների։ Դուք հանրային ինստիտուտի միակ ղեկավարն եք, որին կարող եմ դիմել, քանի որ Ադրբեջանի մնացած բոլոր մարմինները կամ պետական վերահսկողություն են իրականացնում, կամ ձայնագրում են, ուստի չեմ կարող իմանալ»,– ասում է նա։
Վարդանյանը նաև նշում է, որ իրեն անգամ հնարավորություն չեն տալիս դիմելու ՄԻՊ, թեպետ նա միակն է, ով կարող է իրեն օգնել։ Նրա խոսքով՝ դատավճիռը ստանալու համար նա մեկ ամիս է՝ փորձում է կապ հաստատել, սակայն ոչ ռուսերեն, ոչ հայերեն, ոչ էլ ադրբեջաներեն տարբերակներով։ Նա խնդրում է հնարավորություն տալ իրեն և իր գործընկերներին ամեն ինչ քննարկելու, քանի որ Կարմիր խաչը հեռացվել է։
Այս նախադասությունից հետո նրան ընդհատում են։
